07/24/2026 - 21:27 PM
بقلم عادل الحلبي
كل المآذن أدنت
ندهت بلال
وإحنا في سابع ضلال
نايمين هنا
من كام سنة
مأنتخين
ومتعافين
ودفيانين
ومعطرين
وفرحانين بإننا
عايشين على ذل السؤال
وكل حاجة اتشقلبت
حتى الفتاوي إتعلبت
الحلال بيبات حرام
والحرام صبح حلال
-----
لما المآذن أدنت
ندهت بلال
نمنا قبليها بشوية
وقلنا نحلم بالفرج
حاجة شكل التمثيلية
واخدين من الدين رخصته
لا ملامة، وما على النايم حرج
نمنا بدري
لجل ما نسمعش
نوح ام اليمام
يا مسلمين القدس دمه بيستباح
مين يضمد قبلته؟
مين ها يمسح دمعته؟
يا خلق هووووووه
إصحوا قوموا ووحدووووه
لكننا، وبجلالة قدرنا
نمنا على الجنب الشمال
في الف بحر من العسل
والليل لبس توب الصباح
والفجر راح
والظهر راح
والعصر راح
والمغربية ادنت
قمنا نشطف وشنا
جت لينا حالة من الملل
وبالكسل وبالفشل
وبالحول وبالهطل
وبالهبل وبالخبل
أتارينا لما صحينا كنا م الوخم
مش 100 100 مركزين
فا لبسنا في دماغنا النعال
وف رجولنا آلـ عقال
-----
بكت المآذن مننا
وندت بأعلى حسها
إنت فينك يا بلال؟؟؟؟
ما عاد لي من بعدك سند
ولا عاش لي من بعدك ولد
يقف يـ «حي على الفلاح»
ما بقاش لي غير حبة عيال
لو بيعتهم في سوق الرجال
ما يتبعوش..
ولا بـ «بلاش» !!!!
Comments